சின்னதம்பி திரைப்படம் – சில நினைவுகள்

எவ்வளவோ படங்கள் வந்தாலும் சில படங்கள் மட்டுமே அனைத்து தரப்பு மக்களாலும் ரசிக்கப்பட்டு இருக்கும். மேலும் ரீப்பீட்டட் ஆடியன்ஸும் அதிகமாக இருக்கும். உதாரணத்திற்கு சகலகலா வல்லவன், கரகாட்டக்காரன், பாட்ஷா, உள்ளத்தை அள்ளி தா மற்றும் கில்லி போன்ற திரைப்படங்களைச் சொல்லலாம். இந்த வரிசையில் இடம்பெற்ற படம்தான் சின்னதம்பி. அதுவும் இப்படம் வெளியான போது 60 ஆண்டுகால தமிழ் சினிமா வசூல் சாதனையை இது உடைத்து விட்டதாகவே பேசிக்கொண்டார்கள்.

இயக்குநர் ஸ்ரீதரிடம் உதவியாளர்களாக இருந்த சந்தான பாரதியும் வாசுவும் அவரிடம் இருந்து வெளிவந்து, இணைந்து இயக்கிய படங்கள் எல்லாம் பெரிய அளவில் பேசப்படாமல் (பன்னீர் புஷ்பங்கள் தவிர) போக, அவர்களின் பிரிவு தவிர்க்க முடியாமல் ஆனது.

பி வாசு தனித்து இயக்கிய முதல் தமிழ்படம் என் தங்கச்சி படிச்சவ. இந்தப் படத்தின் வெற்றி பலரையும் திரும்பிப் பார்க்க வைத்தது. சத்யா மூவிஸ் வீரப்பன், தான் ரஜினியை வைத்து அடுத்து தயாரிக்க இருந்த பணக்காரன் திரைப்படத்திற்கு வாசுவை ஒப்பந்தம் செய்தார். வாசுவின் தந்தை பீதாம்பரம் எம்ஜியாரின் ஆஸ்தான ஒப்பனைக் கலைஞர் என்பது அவருக்கு மிகப்பெரிய விசிட்டிங் கார்டாக இருந்தது. இந்த சூழ்நிலையில் 1990ல் பணக்காரன் மட்டுமில்லாமல் வேலை கிடைச்சுடுச்சு மற்றும் நடிகன் ஆகிய படங்களை சத்யராஜை வைத்து இயக்கினார்.

வேலை கிடைச்சுடுச்சு படமே கதாநாயகனாக சத்யராஜுக்கு ஒரு திருப்புமுனைப் படம். அதற்கு முன் வந்த படங்களில் எல்லாம் அவரை முழு ஹீரோவாக ஏற்றுக் கொள்ளாதவர்கள் கூட இந்தப் படத்தில் ஏற்றுக் கொண்டார்கள். தொடர்ந்து வந்த நடிகன் படம் சத்யராஜின் மார்க்கெட்டையே உயர்த்தியது.

இந்த நிலையில் தான் பி வாசு சின்னதம்பி பட வேலைகளை ஆரம்பித்தார். அவருக்கு இப்படி ஒரு கதை எப்படி தோன்றியிருக்கும் என்று தெரியவில்லை. ஆனால் படம் வெளிவந்த பின் பல பத்திரிக்கைகள் ப்ரெட்டி வுமன் என்னும் ஆங்கிலப் படத்தை சுட்டுத்தான் இந்தப் படம் எடுக்கப்பட்டது என்று பேசிக்கொண்டார்கள். படகோட்டியைப் பார்த்து டைட்டானிக் எடுக்கப்பட்டது என்பதற்கு இணையான கம்பேரிசனே இது என பின்னாளில் விளங்கியது.

சின்னதம்பி படம் ஆரம்பிக்க நினைத்த உடனேயே அவர் கால்ஷீட் கேட்டது சத்யராஜிடமும், கௌதமியிடமும். சத்யராஜ் கதையைக்கேட்டு இதுக்கு நான் சரிப்பட மாட்டேன். பிரபு செட்டாவார் என்று சொன்னாராம் (இது ஜூனியர் விகடன் பாணி சொன்னாராம் இல்லை. பி வாசுவே ஒரு பேட்டியில் சொன்னது).

சத்யராஜ் தன்னை நன்றாகவே எடை போட்டுத்தான் வைத்திருந்திருக்கிறார். பின்னாளில் அவர் அழகேசன் படத்தில் அறியாதவன் வேஷம் போட்டதால் தமிழ்நாட்டிற்கு ஏற்பட்ட சேதங்களை சினிமா உலகம் அறியும்.

ஆமாம். கவுண்டமணிக்கு ஜென் துறவி வேஷம் கொடுத்தால் கூட அதில் ஒரு வில்லங்க மனிதர் தெரிவார். செந்திலுக்கு மாபியா லீடர் வேடம் கொடுத்தாலும் மஞ்ச மாக்கான் தான் நம் கண்ணுக்கு தெரிவார். அதுபோலத்தான் சத்யராஜும்.

கௌதமிக்கு கால்சீட் பிரச்சனையோ என்னவோ? தெரியவில்லை. குஷ்புவுக்கு அந்த வேடம் வந்தது. முதலில் வாசு இரு மனநிலையில் இருந்தாராம். ஏனென்றால் அதற்கு முன் தான் மைடியர் மார்த்தாண்டன் திரைப்படம் வெளிவந்திருந்தது. ரோமன் ஹாலிடே பட கதையை தட்டி உல்டா செய்திருந்த அந்தப் படத்தில் பிரபு விவரம் தெரியா ராஜகுமாரனாகவும், குஷ்பு நவ நாகரீக மங்கையாகவும் நடித்திருந்தார்கள். மேலும் குஷ்பு கவர்ச்சியின் எல்லையை அந்தப் படத்தின் பாடல் காட்சிகளில் தொட்டிருந்தார். பின் ஒரு வழியாக சமாதானமாகி பிரபு-குஷ்பு-கவுண்டமணி-மனோரமா-ராதாரவி என படையுடன் அவுட்டோருக்கு கிளம்பினார்.

அப்போது மூன்று முக்கியமான சினிமா பத்திரிக்கைகள் இருந்தன. சினிமா எக்ஸ்பிரஸ், பிலிமாலயா மற்றும் வண்ணத்திரை. இதில் பிலிமாலயாவும், வண்ணத்திரையும் கிளிவேஜ் தெரியும் படங்களைத்தான் அட்டைப்படமாகப் போட வேண்டும் என்ற கொள்கையில் இயங்கி வந்ததால் அவை பேட் புக்ஸ் கேட்டகிரியில் இருந்தன. சினிமா எக்ஸ்பிரஸ் மட்டும் ஓரிரு வண்ணப்பக்கங்களுடன் வெளிவரும். அதில் சின்னதம்பி பட அவுட்டோரை கவர் செய்திருந்தார்கள். குஷ்புவின் கன்னங்களில் சந்தனம் தடவி மொக்கையான ஸ்டில்களுடன் அது வெளிவந்தது. படம் பார்க்க வேண்டும் என்ற எந்த எதிர்பார்ப்பையும் தூண்டாத ஆவரேஜ் கவரேஜ்.

ஆனால் அதே நேரத்தில் விஜயகாந்தின் 100வது படமான கேப்டன் பிரபாகரன் பற்றி பரபரப்பு செய்திகள் வந்து கொண்டிருந்தன. 91 ஆம் ஆண்டு தமிழ் புத்தாண்டுக்கு இரண்டு படங்களும் ரிலீஸ். அப்போது மதுரையின் முக்கிய தியேட்டரான நடனாவில் கேப்டன் பிரபாகரன் ரிலீஸ். சின்னதம்பி சக்தி தியேட்டரிலும் அப்போது அவுட்டரில் இருந்த பத்மா என்னும் தியேட்டரிலும் ரிலீஸ் ஆனது. மதுரை ராமநாதபுரம் வினியோக ஏரியா முழுவதும் ஆவரேஜ் தியேட்டர்களிலேயே சின்னதம்பி ரிலீஸானது.

போஸ்டர் டிசைனும் குப்பையாக இருந்தது. ஒரு உருட்டுக்கட்டையோடு பிரபு நிற்க, ஓரத்தில் குஷ்பூ, கவுண்டமணியின் தலையளவு புகைப்படம் மட்டும். என் நண்பர்களுடன் சேர்ந்து கேப்டன் பிரபாகரனை மட்டும் பார்த்து ரசித்துவிட்டு ஊர் திரும்பியாகிவிட்டது.

ஒரு வாரம் இருக்கும். சின்னதம்பி படம் நல்லாயிருக்குடா . என்றான் ஒரு நண்பன். அவன் அக்காவை தேனியில் கட்டிக் கொடுத்திருந்தார்கள். அங்கு சென்ற போது அங்கே சுந்தரம் தியேட்டரில் பார்த்திருக்கிறான்.

“படம் முடிஞ்சு வெளியே வர்றோம்டா, தெருவில இருக்குற கடை, வீடு எல்லாமே அந்தப் பட பாட்டுத்தாண்டா” என்று சிலாகித்தான். (அங்கு அந்தப் படம் 100 நாள் ஓடி சாதனை படைத்தது). நாங்கள் உடனே அந்தப் படம் பார்க்க கிளம்பினோம். அருகில் இருந்த திண்டுக்கல்லில் படம் அப்போது ரிலீஸாகவில்லை. எனவே அடுத்த நாள் மதுரைக்கே வண்டி ஏறினோம். சக்தி தியேட்டர் இருப்பதே ஒரு  பிஸியான வணிகத் தெரு. இந்தப் பட கூட்டமும் சேர்ந்து கொள்ள தெருவே திணறியது. பின் பத்மா திரையரங்குக்கு போனோம் (இப்போது இது மதுரையில் ரிலையன்ஸ் பிரெஷ் கடையாக மாறிவிட்டது).

இப்படி ஒரு கூட்டத்தை அந்த தியேட்டர் அதற்கு முன்னும் கண்டதில்லை. பின்னரும் கண்டதில்லை. அருகில் இருந்த டீக்கடையில் அந்த வாரம் மட்டும் தினமும் 400 லிட்டர் பால் எடை கட்டி அடித்ததாக கடைக்காரர் நண்பரிடம் பெருமையாக பேசிக்கொண்டிருந்தார்.  

படம் பார்த்தாகி விட்டது. எந்த அம்சம் கவர்ந்தது எனத் தெரியவில்லை. இளையராஜாவின் இசையா, குஷ்புவின் இளமையா, கவுண்டமணியின் காமெடியா என பிரித்தறியத் தெரியவில்லை. ஆனால் படத்தை மட்டும் பல தடவை பார்த்தாகி விட்டது. திண்டுக்கல் சோலைஹால், பெரியகுளம் அருள், விருதுநகர்- செண்ட்ரல்,வத்தலக்குண்டு பரிமளம் என அப்படம் திரையிட்ட இடங்களில் எல்லாம் அட்டெண்டென்ஸ் போட்டாகி விட்டது. அப்போதைய கால கட்டத்திற்கு நல்ல ஆக்‌ஷன் படமான கேப்டன் பிரபாகரனையே கான்ஸ்டபிள் ஆக்கியது இந்தப் படம்.

இன்னும் கூட எனக்கு ஏன் இந்தப் படத்தை இத்தனை முறை பார்த்தேன் என்ற கேள்விக்கு விடை இல்லை. பத்திரிக்கைகளில் இந்தப் படத்திற்கு நல்ல விமர்சனம் இல்லை. தீப்பொறி ஆறுமுகம் கூட இந்தப் படத்தை வைத்துத்தான் சிவாஜி குடும்பத்தை நக்கலடிப்பார்.

“அவங்கப்பா ஏன் பிறந்தாய் மகனே? ந்னு பாட்டுப் பாடுவார். மகனுக்கு தாலி தெரியல. என லாஜிக் இல்லா மேஜிக்காய் அடித்து விடுவார்.

முன்னர் குறிப்பிட்ட மற்றும் பெரும்பாலான வசூல் சாதனை படங்களையெல்லாம் பார்த்தால் அவற்றின் மேஜிக் சில ஆண்டுகளுக்காவது நிலைத்திருக்கும். ஆனால் இந்தப் படத்தின் மேஜிக் ஆறு மாதங்களுக்குள் காலாவதியாகி விட்டது. ஒரு படத்தின் வெற்றியை ரீ ரிலிஸ் மற்றும் திருவிழா காலங்களில் உபயதாரர் மூலம் திரையிடல் போன்றவற்றின் வழியாக கணக்கிடலாம். ஆனால் இந்தப் படம் அந்த ஆறுமாதத்துக்குப் பின் அவுட் டேட்டட் ஆகி விட்டது.

அப்படியென்றால் எந்த அம்சம் இந்தப் படத்தை மக்கள் கூட்டமாக வந்து பார்க்கும் படி தூண்டியது? இந்தப் படம் வெளியாவதற்கு ஒரு மாதம்  முன் என் ராசாவின் மனசிலே படம் வந்து வெற்றிகரமாக ஓடிக்கொண்டிருந்தது. உடன் வெளியான கேப்டன் பிரபாகரனும் நல்ல படம்.

ஒருவேளை தமிழ் ஆண்களுக்கு நல்ல வசதியான குடும்பத்தில் கொப்பும் குலையுமான பெண்ணைக் கைபிடிக்க வேண்டும் என்ற ஆழ் மன ஆசை காரணமாக இருக்குமா?    

எது எப்படியோ? இந்தப் படம் திமுகவுக்கு ஒரு ஸ்டார் பேச்சாளரைக் கொடுக்கும் என்று தீப்பொறி ஆறுமுகம் கனவிலும் நினைத்திருக்க மாட்டார்.

2004 ஆம் ஆண்டின் திரைப்படங்கள் – இரண்டாம் பகுதி

முதல் பகுதி இங்கே

விருமாண்டி

கமல் ஹேராமுக்கு அப்புறம் இயக்கிய இரண்டாவது படம். கமலுக்கு இயக்குநராக வசூல் ரீதியில் வெற்றியைக் கொடுத்த முதல் தமிழ் படம். தண்ணீருக்காகத்தான் மூன்றாம் உலகப் போரே நடக்கும் என்று செய்திகள் அடிபடும் சூழலில், தன் கிணற்றில் இருக்கும் வற்றாத தண்ணீருக்காக ஒரு வெள்ளந்தி இளைஞன் சந்திக்கும் சூழ்ச்சிகளும், பிரச்சினைகளும் தான் கதை. தூக்குதண்டனைக்கு எதிரான கருத்துகளும் படத்தில் முன்வைக்கப்பட்டன.

சத்யராஜ் முதலில் இந்தப் படத்தில் நடிப்பதாக செய்தி வெளியாகியது. ஆனால் அவர் மறுத்து விடவே அந்தக் கதாபாத்திரத்தில் நெப்போலியன் நடித்தார். பசுபதி, சண்முகராஜ் ஆகியோருடன் நாசர், ரோகிணி ஆகிய ராஜ்கமல் கம்பெனி கலைஞர்களும் நடித்திருந்தார்கள். பசுபதி அனைவரையும் கவர்ந்தார் என்றாலும் சண்முகராஜ் சர்பிரைஸ் பேக்கேஜ்.

கமல் நாயகி அபிராமியிடம் பேசும் சில வசனங்கள் பஞ்ச் டயலாக்குகளாக இப்போது மாறிவிட்டன.

மன்னிக்கிறவன் மனுஷன், மன்னிப்பு கேட்கிறவன் பெரிய மனுஷன்

ஒருவன் தான் சந்தோஷமா இருக்குறத அந்தக் காலகட்டத்துல உணர்றதில்ல.

ட்ரைலாஜி வரிசையில் தேவர்மகன், விருமாண்டிக்கு அப்புறம் அடுத்த படம் என்னவாயிருக்கும்?

ஆயுத எழுத்து

மணிரத்னம் தமிழ்  ஆடியன்சுக்கு மட்டும் படம் எடுத்துக்கொண்டிருந்த காலத்தில் அவர் படங்கள் நன்றாகத்தான் ஓடிக்கொண்டிருந்தன. ஆனால் எப்போது நேஷனல் ஆடியன்ஸ்ஸை மனதில் வைத்து ஸ்கிரிப்ட் எழுத ஆரம்பித்தாரோ அன்றுடன் அது குறைந்துவிட்டது. அதன்பின் அலைபாயுதே மட்டும் தான் தப்பித்தது. ஆயுத எழுத்துக்கும் அதே கதிதான். கல்லூரி மாணவர்கள் அரசியலுக்கு வரவேண்டும் என்ற கருத்துடன் (ஏம்பா நான் சரியாத்தான் பேசுறனா?) எடுக்கப்பட்ட படம். சூர்யாவின் அம்மா,ஈஷா தியோல் ஆகியோர் படத்துடன் ஒன்றவிடாமல் தடுத்தனர். பாரதிராஜாவுக்கு கெட்ட அரசியல்வாதி (என்னைய்யா ஒரு பொருட் பன்மொழி என்றெல்லாம் கேட்கப்படாது) வேடம். சித்தார்த், அவரின் அப்பா ஆகியோர் மணிரத்னம் படத்தில் வழக்கமாக வரும் கதாபாத்திரங்கள். மூன்று மணி நேரம் என்பது எவ்வளவு நேரம் என்பதை உணரவைத்த படம்.

கண்களால் கைது செய்

பட்டைச் சாரயம் போரடிக்கும் போது பாரின் ஸ்காட்சுக்கு போவது போல கிராமப் படங்கள் போரடிக்கும் போது திரில்லர் பக்கம் எட்டிப் பார்ப்பார் பாரதி ராஜா. சிகப்பு ரோஜாக்கள், டிக் டி டிக் ஆகிய படங்கள் வெற்றி பெற்றன. ஆனால் கேப்டன் மகள் படு தோல்வி. மீண்டும் பல ஆண்டுகள் கழித்து இந்தப் படத்தை இயக்கினார். கிளப்டோமேனியா இருக்கும் நாயகன் ஒரு கண்காட்சியில் இருக்கும் வைரத்தை சுட்டுவிட, சேல்ஸ் கேர்ள் மீது சந்தேகம் எழுகிறது. அப்பெண்ணின் காதலனான போலிஸ் அதிகாரி அப்பெண்ணையே தூண்டிலாக வைத்து அவனைப் பிடிக்க நினைக்கிறார். பின்னர்தான் நாயகனுக்கு மனச்சிதைவும் இருப்பது தெரிய வருகிறது. சுஜாதா வசனம், ரஹ்மான் இசை என பல அயிட்டங்கள் இருந்தும் படம் மக்களை கவரவில்லை.

எதிரி

கே எஸ் ரவிகுமார் இயக்கி மாதவன் நடிப்பில் வெளியான படம். விவேக் காமெடி, சதா, பூமிகா, டெல்லிகணேஷ் நல்ல விகிதத்தில் கலந்து கொடுத்திருந்தார் இயக்குநர்.

கோவில், அருள்

சாமி வெற்றிக்குப் பின் வந்த இந்த இரண்டு ஹரி படங்களும் ஆவரேஜ்தான்.

ஏய்

வடிவேலுவின் காமெடியும், நமீதாவின் கவர்ச்சியும் இந்த சரத்குமார் படத்தை காப்பாற்றியது. இயக்குநர் வெங்கடேஷ்க்கு இந்தப் படமும், இதே ஆண்டில் சிலம்பரசன் நடிப்பில் வெளியான குத்து படமும் முதலுக்கு மோசமில்லாமல் போனது.

மகா நடிகன்

நமீதாவாலும் லொல்லு சபா டைப் காமெடியாலும் காப்பாற்றப்பட்ட சத்யராஜ் படம். சக்தி சிதம்பரம் இயக்கம். இந்த ஆண்டில் சேட்டை, செம ரகளை, ஜோர், அடிதடி என பல காமெடிப் படங்களில் நடித்திருந்தார் சத்யராஜ்.

கிரி

வடிவேலுவால் இந்த ஆண்டு காப்பாற்றப்பட்ட இன்னொரு படம். சுந்தர் சி இயக்கம், அர்ஜூன் சண்டை, ரீமா சென் மற்றும் குத்து ரம்யா கவர்ச்சி, பிரகாஷ் ராஜ், தேவயானி நடிப்பு என குஷ்பு தயாரிப்பில் ஒரு அக்மார்க் மசாலா படம். சிங்கம் சிங்கிளாத்தன் வரும் என்ற பஞ்ச் டயலாக் முதன் முதலில் பேசப்பட்ட படம்.

அரசாட்சி

தமிழுக்கு வந்த உலக அழகிகள் வரிசையில் இருந்து விட்டுப் போகட்டுமே என்று லாரா தத்தாவை கூட்டி வந்து மகராஜன் இயக்கிய படம். அர்ஜூன், நாசர், பி வாசு, மன்சூர் அலிகான் என தேவையான நடிகர்கள், எஸ் வி சேகர், விவேக் காமெடி இருந்தும் படம் கவரவில்லை. தப்புச் செய்ய்றவனுக்கு வாதாடும் வக்கீலை போட்டுத்தள்ளினால் குற்றங்கள் குறைந்துவிடும் என்று ஷங்கர் தனமான தீர்வைச் சொன்ன படம்.

அட்டகாசம்

சில மன வருத்தங்களுக்குப் பின் அஜீத் சரண் இணைந்த படம். அஜீத்துக்கு இரட்டை வேடம். அஜீத்துக்கு கொஞ்சம் இமேஜ் பில்ட் அப் செய்ய மட்டும் உதவியது. ஷாஜி கைலாஸ் இயக்கத்தில் அஜீத் நடித்த ஜனா படமும் இந்த ஆண்டு வெளியாகி ஜண்டு பாம் விறபனையை அதிகரித்தது. நியாயப் படி இந்தப் படத்தை ரீமேக் (பாட்ஷா) லிஸ்டில் தான் சேர்த்திருக்க வேண்டும்.

சுள்ளான்

திருமலை வெற்றிக்குப்பின் இயக்குநர் ரமணா இயக்கிய படம். தனுஷ் நாயகன். எறும்பின் தலையில் இமயமலை. புதுக்கோட்டையிலிருந்து சரவணனும் இந்தப் படமும் தனுஷின் ஆரம்பகால வெற்றிப் பயணத்தின் தடைக்கற்கள்.

மதுர

கில்லியின் வெற்றிக்குப் பின் வந்த விஜயின் படம். ஷங்கரின் இணை இயக்குநர் மாதேஷ் இயக்கிய படம். தம் ரக்‌ஷிதா, சோனியா அகர்வால், தேஜா ஸ்ரீ என நாயகிகள், வடிவேலு நகைச்சுவை, பசுபதி வில்லத்தனம் என அம்சங்கள். விமர்சகர்கள் கிழித்தாலும் தயாரிப்பாளர் டவுசர் கிழியவில்லை.

வானம் வசப்படும்

பி சி ஸ்ரீராம் இயக்கம். படமும், வந்த நேரமும் சரியில்லை. பார்க்க போனவர்களுக்கும் தான்.

ஜெய்

முதலில் மாதேஷ் இயக்குவதாக இருந்து, பின் அவர் விலகிக் கொள்ள நாராயணன் என்பவர் இயக்கிய பிரசாந்த் படம். அந்த ஆண்டு வெளியான பாட்டம் பத்தில் இதற்கு நிச்சய இடம் உண்டு.

இந்த ஆண்டில் வடிவேலு தான் காமெடியில் டாப். ஏய், சத்ரபதி, அருள், கோவில், கிரி, எங்கள் அண்ணா, ஜோர், மதுர என கொடிகட்டிப் பறந்தார்.

விவேக்கும் தன் பங்குக்கு செல்லமே, எம் குமரன் சன் ஆப் மகா லட்சுமி, எதிரி, அரசாட்சி என கலக்கினார்.

நீங்கள் இன்று சிரிப்பொலி அல்லது ஆதித்யா பாருங்கள். மேற்கூறிய படங்களில் இருந்து நிச்சயம் கிளிப்பிங்ஸ் இருக்கும்.

தமிழர்களின் கனவை   இந்த ஆண்டில் அதிகம் ஆக்ரமித்தது நமீதா தான். ஏய், மகா நடிகன், எங்கள் அண்ணா படங்களில் சித்தப்பூ நடிகர்களுக்கு துணையாக வந்தார்.

இந்த ஆண்டில் பாலகிருஷ்ணன் இயக்கத்தில், இளையராஜா இசையில் ரிச்சர்ட் மதுரம் நடித்த காமராஜர் படம் வெளியானது.

ரீமேக் படங்களும் காதல் படங்களும் கலக்கிய 2004

தமிழ்சினிமா உலகுக்கு ரீமேக் ஒன்றும் புதிதில்லை என்றாலும், ஓர் ஆண்டில் வெற்றி பெற்ற படங்களில் பெரும்பாலானவை ரீ மேக் படங்களாய் இருந்தது இந்த ஆண்டில்தான். அதுதவிர சில வித்தியாச காதல் படங்களும் இந்த ஆண்டு வெளிவந்தன.

முதலில் ரீமேக்குகளைப் பார்ப்போம்.

கில்லி

கதாநாயகனாக நடிக்க வந்த காலத்தில் இருந்தே நிறைய ஆக்‌ஷன் படங்களில் நடித்திருந்தாலும் விஜய்க்கு சாப்ட் கேரக்டர் படங்களே நிறைய வெற்றியைத் தந்திருந்தன. அதனால்தான் எஸ் ஏ சந்திரசேகர் கூட நெஞ்சினிலே படத்தை இயக்கும் போது, இது என் மகனுக்கு நான் வைக்கும் ஆசிட் டெஸ்ட் என்று சொல்லியிருந்தார். விஜய் முழுக்க முழுக்க ஆக்‌ஷன் ஹீரோவாக வெற்றி பெற்ற படம் என்றால் திருமலை திரைப்படத்தைத் தான் சொல்ல வேண்டும். அந்தப் படம் அதற்கு முன் வந்த சில படங்களால் தள்ளாடிக் கொண்டிருந்த விஜய் மார்க்கெட்டை ஸ்டெடி செய்தது. தெலுங்கில் பெரு வெற்றி பெற்ற ஒக்கடுவின் ரீமேக்கான கில்லி விஜயின் மார்க்கெட்டை பல படிகள் தூக்கியது. கில்லியின் இயக்குநர் தரணிக்கு இதுதான் இன்றைய தேதி வரை வெற்றிப்படமாக இருக்கிறது. திருட்டு விசிடியையும் மீறி, உதயம் காம்ப்ளக்ஸின் எல்லா திரைகளிலும் இந்தப் படம் அரங்கு நிறைந்த காட்சிகளாக பல நாட்களுக்கு ஓடியது. ரஜினிக்கு ஒரு பாட்ஷா, கமலுக்கு ஒரு நாயகன் என்று சொல்வது போல விஜய்க்கு ஒரு கில்லி.

வசூல் ராஜா எம் பி பி எஸ்

மருத்தவமனை/மருத்துவர்கள் மனிதாபிமானமாய் இருக்க வேண்டும் என்ற கருத்துடன் வந்த இந்திப் படம் முன்னாபாய் எம் பி பி எஸ்ஸின் ரீமேக்கான இது வசூலிலும் ராஜாவானது. இந்தப் படத்தில் கமலின் அப்பாவாக நடிக்க பாலசந்தரை அணுகியபோது அவர் மறுக்க நாகேஷ் அந்த கேரக்டரில் நடித்தார். ஆனால் பாலசந்தர் அதற்குப் பின் டிவி சீரியல், தாமிரா இயக்கிய ரெட்டை சுழி  என நடிப்பு அவதாரம் எடுத்தார். இதுவரை தனது கேரியரில் கிரேஸி மோகன் அழுத படம் இதுவாகத்தான் இருக்க முடியும். டாக்டர் பொண்ணு நோ சொன்னா நர்ஸ் பொண்ண காதலி இப்போது பெரும்பாலும் எல்லோராலும் ஏற்றுக் கொள்ளப்பட்டு வருகிறது. அம்ஜத்கான், டிம்பிள் கபாடியா, சலீம் கௌஸ், அதுல் குல்கர்னி என பல வேற்று மொழி கலைஞர்களை தமிழுக்கு கொண்டுவந்த கமல் இதில் காந்தி படத்தில் கஸ்தூரிபாயாக நடித்த ரோஹிணி ஹட்டாங்குடியை தன் அம்மா வேடத்தில் நடிக்க வைத்தார். காகா ராதாகிருஷ்ணன், பிரகாஷ்ராஜ் ஆகியோர் படத்துக்கு சிறப்பு சேர்த்தார்கள்.

எங்கள் அண்ணா

குரோனிக்கில் பேச்சிலர் என்ற மலையாளப் படத்தின் ரீ மேக் இந்தப் படம். விஜயகாந்தின் அரைத் தங்கை சொர்ணமால்யாவின் காதலர் வேடத்தில் முதலில் கார்த்திக் நடிப்பதாக இருந்தது. பின்னர் அந்த வேடத்தில் பிரபுதேவா நடித்தார். வடிவேலுவின் காமெடியும் நமீதாவின் அழகும் இந்தப் படத்தின் பிளஸ் பாயிண்ட்.

பேரழகன்

திலீப் நடித்த குஞ்சிக்கூனன் படத்தின் ரீமேக். சூர்யாவுக்கு இரட்டை வேடம். ஜோதிகாவுக்கும்.  பெரும்பாலான தமிழ்படங்களில் மாற்றுத் திறனாளி ஹீரோ என்றாலே அவரைச் சுற்றி ஒரு சோக வளையம் இருக்கும். இந்தப் படத்தில் அங்க ஹீனமுள்ள நாயகனைச் சுற்றி நவரசமும் நடை போடும். ஓரளவு ஓடியது. அன்பு நண்பர் கேபிள் சங்கர் இந்தப் படத்தில் ஒரு காட்சியில் நடித்திருக்கிறார். (பாக்ஸிங் சீன்).

குமரன் சன் ஆப் மகாலட்சுமி

ரீமேக் ராஜா தன் தம்பி ஜெயம் ரவியை வைத்து எடுத்த படம். அம்மா நானா ஓ தமிழ் அம்மாயி என்ற தெலுங்குப் படத்தின் ரீமேக்கான இந்தப்படம் அசினை ராசியான ஹீரோயினியாக்கியது. இயக்குநர் தரணி இப்படத்தின் படப்பிடிப்பின் போது ராஜாவிடம் “நதியா நடிக்கிறாங்கண்ணா நான் உதவி இயக்குநரா வர்றேன்” என்றாராம். அப்படி ஒரு தலைமுறையை கவர்ந்திருந்த நதியா ரீ எண்டிரி ஆன படம்.

கஜேந்திரா

ராஜமவுலியின் சிம்மாத்ரி பட ரீமேக் இது. சுரேஷ் கிருஷ்ணா கமலுக்கு ஆளவந்தானையும், ரஜினிக்கு பாபாவையும் கொடுத்த பின்னரும் விஜயகாந்த் துணிந்து இறங்கிய படம். படு தோல்வி.

ஷாக்

இந்தி திகில் படமான பூட் ஐ தழுவி எடுக்கப்பட்ட படம். தியாகராஜனும் தன் மகன் நன்றாக வர வேண்டுமென என்னென்னவோ செய்கிறார். ஆனால் எதுவும் ஒர்க் அவுட் ஆக மாட்டென் என்கிறது.

இது தவிர அன் அபீசியலாக ட்ரு மேன் ஷோவை தழுவி பார்த்திபன் குடைக்குள் மழையையும், பிக் படத்தை தழுவி எஸ் ஜே சூர்யா நியூ படத்தையும் கொடுத்தார்கள். நியூ ரஹ்மானின் ஹிட் பாடல்களாலும், ஸ்ட்ரக்சர் குயின் சிம்ரனாலும், எஸ் ஜே சூர்யா பிராண்ட் காட்சிகளாலும் நன்கு கல்லா கட்டியது.

காதல் படங்கள்

ஆட்டோகிராப்

அழகி பட வெற்றிக்குப் பின் பல நாஸ்டால்ஜியா படங்கள் வந்தன. அதில் குறிப்பிடத்தக்க வெற்றிப்படம் ஆட்டோகிராப். ஒரு ஆணின் பள்ளி, கல்லூரி, அலுவலகத்தில் அவன் சந்திக்கும் காதல் பற்றிய கதை. இது பெண்ணின் பார்வையில் எடுக்கப்பட்டிருந்தால் பல விளைவுகளைச் சந்தித்து இருக்கும்.

காதல்

ஷங்கரின் உதவி இயக்குநர் பாலாஜி சக்திவேல் முதல் படம் சாமுராயில் சறுக்கி இருந்தாலும் தன் குரு தயாரித்த இந்தப் படத்தின் மூலம் நிமிர்ந்தார். உண்மைக் கதையை தழுவிய படம் என்ற விளம்பரத்துடன் வந்தது. மெக்கானிக் ஷெட் ஹீரோ ஒயின் ஷாப் ஓனர் மகளை காதலிக்கும் கதை. ஜாதிய பிரச்சினையும் உண்டு. எதிர்பாராத முடிவு கலங்க வைத்தது. ஜோஸ்வா ஸ்ரீதர் இப்படத்தின் இசை அறிமுகம். ஆனால் இப்படத்திற்குப் பின் அதிகம் பிரகாசிக்கவில்லை. காதல் தண்டபாணி, காதல் சுகுமார், காதல் சந்தியா என்ற அடைமொழிகளே இப்படத்தின் பெரு வெற்றியைச் சொல்லும்.  

7ஜி ரெயின்போ காலனி

இது கே கே நகரின் காதல்கதை என்ற டேக் லைனுடன் வந்த படம். ஏ எம் ரத்னத்தின் மகன் ரவி கிருஷ்ணாவுக்கு நல்ல அறிமுகத்தைக் கொடுத்த படம். காதல் கை கூடாத நிலையில் காதலி தன்னை அவனுக்கு பரிசாக கொடுத்துவிட்டு பிரிய நினைக்கிறாள் என்ற கருத்துடன் வந்த படம். செல்வராகவனின் இயக்கமும், யுவனின் இசையும், முத்துக்குமாரின் வரிகளும் படத்தை தூக்கி நிறுத்தின. நினைத்து நினைத்து பார்த்தேன் பாடல் ஒன்றே இந்தப் படத்தைப் பற்றிச் சொல்ல போதும்.

அழகிய தீயே

என் பிரண்ட் ராதா மோகன் இயக்கிய  படத்தை நான் பார்க்கணும். அதுக்கு டிக்கட் ரெண்டு கோடின்னு நினைச்சிட்டுப் போறேன் என்று சொல்லி  பிரகாஷ் ராஜ் தயாரித்த படம். நம்பிக்கையை காப்பாற்றினார் ராதாமோகன். சினிமா வாய்ப்பு தேடும் இளைஞன், பணத் தேவைக்காக பணக்காரப் பெண்ணின் காதலனாக நடிக்கப் போய் பின் உணமையாகவே காதலில் விழுகிறான். பிரசன்னா, நவ்யா நாயர் இணை. ஆனால் படத்தில் அதிகம் கவனம் ஈர்த்தது பிரசன்னாவின் நண்பனாக வரும் குமரவேலுவும், அண்ணாச்சியாக நடித்த எம் எஸ் பாஸ்கரும். படத்தின் பிளஸ் பாயிண்ட் விஜியின் வசனங்கள்.   

செல்லமே

இந்தியன் பட இணை இயக்குநர் காந்தி கிருஷ்ணா இயக்கிய படம்.  அடுத்து கமல் இவர் படத்தில்தான் நடிக்கப் போகிறார் என்ற வதந்தி இந்தியன் வெளியானபோது இருந்தது. பின் இவர் அரவிந்த்சாமி, மாதுரி தீட்சித் காம்பினேஷனில் எஞ்சினியர் என்னும் படம்  இயக்கப் போவதாக விளம்பரங்கள் வந்தன. அணை கட்டப் படும் களத்தில் படம் இயங்கும் என்ற ஹேஸ்யத்துடன் பல அருமையான ஸ்டில்கள் வெளியாகின. மாதுரி தீட்சித் மொட்டை போடப்போவதாக கூட செய்திகள் வெளியாகின. ஆனால் படம் எடுக்கப்படவில்லை. பின் இவர் நிலாக்காலம் என்னும் படத்தை எடுத்தார். அதன்பின் இயக்கிய இப்படம் மூலம் விஷால் அறிமுகமானார்.

ஒரு பையனுக்கு தன்னிடம் பாசம் காட்டும் தன்னை விட மூத்த பெண்ணுடன் வரும் காதல், அவள் திருமணம் செய்து கொண்டாலும் அதை ஏற்றுக் கொள்ள முடியாமல் அல்லாடுவது, அதற்காக கடத்தல் வரை இறங்குவது என கதைக் களம். பரத்திடம் அன்பு காட்டும் பெண்ணாக ரீமாசென், அவளின் விஷால். விவேக்கின் காமெடி, ஹாரிஸ் ஜெயராஜின் பாடல்கள், சுஜாதாவின் வசனம், கேவி ஆனந்தின் ஒளிப்பதிவு ஆகியவை பிளஸாக அமைந்தன.

சுஜாதாவுக்கு இவர் மேல் எப்போதும் ஒரு ஷாஃப்ட் கார்னர் இருந்து வந்திருந்தது. எஞ்சினியரிலும் அவர் பங்கிருந்தது. நிலாக்காலமும் சுஜாதா உடையதே. பின் இவர் இயக்கிய ஆனந்த தாண்டவமும் (பிரிவோம் சந்திப்போம்) சுஜாதாவே.

தென்றல்

ஜெயகாந்தன் டைப் இலக்கியவாதி பார்த்திபனை காதலிக்கும் அப்பாவி பெண், தன்னையே அவரிடம் இழக்கிறாள். குழந்தை பிறக்கிறது. அது தன் குழந்தை என அவருக்கு தெரியவரும் சிக்கல்கள் என்ற கதைக்களம். தங்கர் பச்சான் இயக்கத்தில் வெளியான இந்தப் படம் பெரிதாக போகவில்லை. ராகவேந்திரா லாரன்ஸ் ஆடிய பறை பாடல் நன்றாக படமாக்கப்பட்டிருந்தது.

மன்மதன்

இதை ரீமேக் வகையிலும் (சிகப்பு ரோஜாக்கள்) சேர்க்கலாம். கோடாம்பாக்க ரேஸில் இப்போதுதான் குதிரையில் ஏறியிருக்கிறார் சிம்பு என விகடன் சிலாகித்தது. காதலில் துரோகம் செய்யப்பட்டு தற்கொலை செய்யும் தம்பிக்காக அண்ணன் துரோகம் செய்யும் பெண்களையெல்லாம் பழிவாங்கும் கதை.

அடிதடி

திருமணம் செய்து கொள்ளாத தாதா சத்யராஜுக்கு இளம் பெண் ரதி மீது காதல் வந்து விடுகிறது. அதைத் தொடர்ந்து நடக்கும் களேபரங்களும், பின் அவர் திருந்துவதும் தான் கதை. லோ பட்ஜெட்டில் எடுக்கப்பட்டு லொல்லு சபா டைப் காமெடியால் நல்ல வசூல் கொடுத்த படம்.

அழகேசன்

இதுவும் சத்யாரஜ் படமே. சிப்பிக்குள் முத்து போல ஒரு காதல். ஆனால் அது பட வெற்றிக்கு கைகூடவில்லை.

மீதமுள்ள படங்களைப் பற்றிய பார்வை இரண்டாம் பாகத்தில்