பாரதிராஜாவின் மறக்க முடியாத பெண்பாத்திரங்கள்

கடந்த 10 ஆண்டுகளாக சிறந்த படம் எதுவும் தராவிட்டாலும் மறக்க முடியாத, மறக்க கூடாத இயக்குநர் பாரதிராஜா.

ராதிகா
ராதா
ரேவதி
ரேகா
ரஞ்சனி
ரமா
ரஞ்சிதா
ராஜஸ்ரீ
ரியா சென் போன்ற R வரிசை கதாநாயகிகளையும்

சுகன்யா,பிரியாமணி போன்றவர்களையும் தமிழுக்கு தந்தவர்.

கமலா காமேஷ், வடிவுக்கரசி மற்றும் காந்திமதி போன்றவர்களுக்கு புது பரிமானம் தந்தவர்.

இவர் படங்களில் பெரும்பாலும் பெண்கதாபாத்திரத்தைச் சுற்றியே கதை நகரும். இவர் உருவாக்கியதில் மறக்க முடியாதவை எனில்

1) வடிவுக்கரசி – முதல் மரியாதை
2) ராதிகா - பசும்பொன்
3) ராதா - டிக் டிக் டிக்


பாரதிராஜாவின் படைப்புகளிலேயே சிறந்த பாத்திரம் முதல்மரியாதை வடிவுக்கரசி தான் என்பது என் கருத்து. அதற்கு முன்னால் அத்தகைய குணங்களுடன் தமிழ்திரையில் எந்த பெண் பாத்திரமும் படைக்கப்படவில்லை. ஒருவனுடன் காதல்/உறவு கொண்டபின் குடும்ப கவுரவத்திற்காக இன்னொருவனை (அந்தஸ்து குறைந்தவனை) மணந்து அவனை மன சித்திரவதை செய்யும் பாத்திரம். அருமையாக நடித்திருப்பார் அவர். இப்பொழுதும் கூட பல பெண்கள் தங்கள் குடும்ப கவுரவத்திற்காக பிடித்தமில்லா ஆண்களை மணந்து தாங்களும் கஷ்டப்பட்டு துணையையும் பாடுபடுத்துவதுண்டு. அவர்களின் மொத்த பிரதிபலிப்பாக அந்த பாத்திரம் படைக்கப்பட்டிருக்கும். நாம் இப்பொழுதும் பூங்காக்களிலும் நூலகங்களிலும் 50 வயதுக்கு மேற்பட்ட ஆண்கள் நேரத்தை கொன்று கொண்டிருப்பதைப் பார்க்கலாம். அவர்களில் பலர் மனைவியின் சொல் பொறுக்க மாட்டாமல் சுற்றுபவர்களே. எல்லா பெண்களும் ராஜகுமாரனை எதிர்பார்க்கிறார்கள். பலருக்கு குமாஸ்தாக்களே கிடைக்கிறார்கள். எதிர்பார்ப்பின் ஏமாற்றம் ஆண் தளர்ந்தபின் வெடிக்கிறது. சமூகத்தின் அருமையான பிரதிபலிப்பு அந்த பாத்திரம்.

பசும்பொன்னில் ராதிகாவின் பாத்திரம் யதார்த்தத்தில் (இந்தியாவில்) இல்லாதது. ஆனால் சமூகத்திற்கு அவசியமானது. கணவனை இழந்த பெண் இன்னொருவனை மணக்கிறாள். அதனால் முதல் கணவன் மூலம் பெற்ற மகன் அடையும் வருத்தமும் இரண்டாவது கணவன் மகன்களுடன் அவனது மோதலும் அவளை வருந்த வைக்கிறது. முதல் பையனின் பாசத்துக்கு ஏங்குகிறாள். இந்தப்படத்தில் பெண்ணின் இரண்டாம் திருமணத்தை ஆதரிப்பது போல் இருந்தாலும் அதனால் நிறைய பிரச்சினைகள் வரும் என எச்சரிப்பதுபோலவே காட்சிகள் இருந்தன. இரண்டாம் திருமணம் செய்ய நினைப்பவர்களை மறைமுகமாக எச்சரிப்பது போலவே இப்படத்தின் தொனி இருந்தது. இப்படத்தின் கதாநாயகிக்கு பின்னாளில் நிஜ வாழ்க்கையிலும் இதே சூழல் நேரிட்டது.

வெளியில் கவர்ச்சி மாடலாகவும் வீட்டில் ஆச்சாரமான பெண்ணாகவும் இருக்கும் பாத்திரம் டிக் டிக் டிக் ல் ராதாவுக்கு. அம்மாதிரி இருக்க நேரிடும் பெண்ணின் உணர்வுகளை ராதா நன்கு பிரதிபலித்திரிப்பார்.

தொடர்ந்து பாரதிராஜா தமிழ்சினிமாவுக்கு நல்ல நடிகைகளையும், பாத்திரங்களையும் அளிக்க வேண்டும் என்பதே என் விருப்பம்