வைதேகி காத்திருந்தாள்

வைதேகி காத்திருந்தாள் என்கிற படப்பெயரைக் கேட்ட உடன், பலருக்கும் பல விஷயங்கள் ஞாபகம் வரும். இளையராஜா, ஒரு படத்திற்கான கம்போசிங் முடிந்த பின்னர், அன்று இருந்த மீத நேரத்தில் சில ட்யூன்களை கம்போசிங் செய்து வைத்திருந்தார். அதை மொத்தமாக ஒரு படத்திற்குத்தான் கொடுப்பேன் என்று சொன்னார். அந்த ட்யூன்களை வாங்கி, அதற்கேற்ப சிச்சுவேஷன்கள், திரைக்கதை என அமைத்து ஆர் சுந்தர்ராஜன் இயக்கிய படம். கவுண்டமணி - செந்தில் என்கிற நகைச்சுவை காம்பினேஷன் என்ற ஒன்று மிக மிக பலமாக உருவாக காரணமாக இருந்த படம். இந்த காம்பினேஷன் இருந்தாலே ஒரு படத்திற்கு மினிமம் கியாரண்டி நிச்சயம் என்ற எண்ணத்தை தமிழ் சினிமாவிற்கு விதைத்த படம். ஆல் இன் ஆல் அழகுராஜா, பெட்ரோமக்ஸ் லைட், கால்கிலோ அல்வா, மல்லிகைப்பூ, ரங்கநாதன்கிற பேருக்கு சைக்கிள் தர்றதில்ல, கோழி குருடா இருந்தாலும் குழம்பு ருசியா இருந்தா போதாதா, வயித்து வலிக்கு ரெண்டு இட்லி கெட்டிச் சட்னி என 40 ஆண்டுகள் ஆகியும் தமிழ்நாட்டின் வக்காபுலரியில் இருந்து மறையாத சொற்களை கொண்ட படம். ஒரு நாயகன் இரவில் பாடுவான். அவன் பாடலைக் கேட்டு ஊரே மயங்கும். என்கிற ஒரு கான்செப்டை கொடுத்த படம். அதையொட்டி பல இன்ஸ்பிரேஷன்கள், ஸ்பூப்கள் உருவாக காரணமாக இருந்த படம். ராசாத்தி உன்ன காணாத நெஞ்சு, மேகம் கருக்கையிலே, இன்றைக்கு ஏன் இந்த ஆனந்தமே? என கூட்டமாக கூடி வைப் செய்யக்கூடிய பாடல்கள். மூன்று கதைகள் இணைந்த படம். தண்ணீர் இல்லாததால் காதலியை இழந்தவன், தண்ணீர் அதிகமாக இருந்ததால் கணவனை இழந்த பெண், இருவரும் சேர்ந்து ஒரு காதலை சேர்க்கும் படம். என எத்தனையோ ஞாபகம் வரும். ஆனால் இந்தப் படத்தில் விஜய்காந்த் செய்த குறும்புத்தனமான கிராமத்து வாலிபன் வேடம் என்பது அதிகம் கவனிக்கப் படாமல் போனது. தமிழ் சினிமா வரலாற்றில் எம் கே தியாகராஜா பாகவதர் - சின்னப்பா காலம் துவங்கி எம்ஜியார்-சிவாஜி காலம் வரை உண்மைக்கு நெருக்கமான கிராமத்து படங்கள் வரவில்லை. தேவராஜ் - மோகன், பாரதிராஜா வருகைக்குப் பின்னர் அது சாத்தியமானது. ஆனால் ஒரு யதார்த்தமான, லைவ்லியான, குறும்புத்தனமான, கிராமத்தில் நாம் பார்க்கும் காதலிக்கும் இளைஞன் கேரக்டரை, அதுவரை ரஜினி-கமல் காலம் வரையும் கூட யாரும் திரையில் அப்படியே கொண்டு வரவில்லை. 16 வயதினிலே படத்தில் சப்பாணி, பரட்டை என கேரக்டர்கள் வந்தன. ஆனால், அட இது நம்ம சித்தப்பா, அண்ணன், மாமா, அத்தை மகன் இப்படித்தானே இருப்பார்கள் என்கிற உணர்வை கிராமத்துப் படங்களில் நடிக்கும் போது, முதன் முதலில் கொண்டு வந்தது விஜய்காந்த் தான். அவர் அளவிற்கு தமிழ்சினிமாவில் அந்த கிராமத்து நாயகன் வேடத்தை மிகுந்த நம்பகத்தன்மையுடன், கண்டு மகிழும்படியாக திரையில் கொண்டு வந்தது விஜய்காந்த் தான். ராமராஜன் அதன் பின்னர் நடித்த எல்லாப் படங்களிலும் அந்த கேரக்டரின் சாயல் இருக்கும். ஒரு நடிகனை, தமிழ்நாட்டு மக்கள் ஆக்‌ஷன் ஹீரோவாக ஏற்றுக் கொள்வதற்கு சில காலம் பிடிக்கும். அப்படி ஏற்றுக்கொண்டு விட்டால் அவர்கள் திரைத்துறையில் வெகுகாலம் நீடித்து நிற்பார்கள். விஜய்காந்த் எல்லாம் நடிக்க வந்த ஒன்றிரண்டு ஆண்டுகளிலேயே, தமிழ்நாட்டு மக்களால் யுனானிமஸாக ஆக்‌ஷன் ஹீரோவாக ஏற்றுக்கொள்ளப்பட்டவர். வைதேகி காத்திருந்தாள் படம் வெளியான 1984 ஆம் ஆண்டிலேயே அவர் வெற்றி, நூறாவது நாள், வெள்ளைப்புறா ஒன்று, நூறாவது நாள் என ஏகப்பட்ட ஆக்‌ஷன் படங்களில் நடித்திருந்தார். இப்போது, சசிகுமாருக்கு சொல்கிறார்களே, இவர் நல்லவர் என சொல்வதற்கு, காரக்டர் ஆர்க் ஏற்படுத்துவதற்கு தனியாக சீன் தேவையில்லை. சசிகுமாரைக் காட்டினாலே மக்கள் நல்லவர் என்று மைண்ட் செட்டிற்குப் போய் விடுவார்கள் என. அதுபோல விஜய்காந்த்திற்கும் நடிக்க வந்த ஒராண்டிலேயே இவர் மிகப்பெரிய ஆக்‌ஷன் ஹீரோ என்கிற இமேஜ் வந்துவிட்டது. அந்த கேரக்டர் ஆர்க் கொண்டுவர எந்த அறிமுக காட்சிகளும் தேவையில்லாமல் போய்விட்டது. விஜய்காந்த் போட்டோ போஸ்டரில் இருந்தாலே, இது ஆக்‌ஷன் படம் என இளைஞர்கள், சிறுவர்கள் தியேட்டர் கியூவில் போய் நின்று விடுவார்கள். அப்படி இருந்த சூழலில், வைதேகி காத்திருந்தாளில் வெள்ளைச்சாமி என்கிற கேரக்டரை ஏற்கிறார் விஜய்காந்த். ஒரு அத்தாரிட்டிவ் கிராமத்து இளைஞனை அப்படியே கொண்டு வருகிறார். 1984 தீபாவளிக்கு படம் வெளிவருகிறது. உடன் ஏவி எம் தயாரிப்பில் ரஜினிகாந்தின் நல்லவனுக்கு நல்லவன், அந்த ஆண்டு ஆறேழு இந்திப்படங்களில் நடித்துக் கொண்டிருந்துவிட்டு தமிழ் கோட்டாவிற்காக கமல் நடித்த மறுஜென்மம் பற்றிய எனக்குள் ஒருவன் படங்கள் வந்தன. அதையெல்லாம் விட இந்தியாவின் முதல் 3டி திரைப்படம் மலையாள மை டியர் குட்டிச் சாத்தான் படத்தின் டப்பிங்கும். வலுவான போட்டி. கண்ணாடி போட்டு படம் பார்க்கனுமாம், எல்லாமே கிட்டக்க வருதாம் என தமிழ்நாட்டு மக்கள் அந்த அனுபவத்திற்காக வரிசையில் நின்றார்கள். டிசம்பர் மாத அரையாண்டு விடுமுறையில் எல்லாம் இந்தப் படத்தைப் பார்க்காவிட்டால், ஸ்கூல் டிசி கொடுத்து விடுவார்கள் என்னும் அளவிற்கு ஸ்கூல் பையன்கள் குடும்பத்தோடு வந்தார்கள். நல்லவனுக்கு நல்லவன் பெரிய ஹிட். எனக்குள் ஒருவன் நல்ல ஹிட் என்று சொல்லமுடியாவிட்டாலும், சில திரையரங்குகளில் 100 வது நாள் வரை ஓடியது. வைதேகி காத்திருந்தாள் படம் தான் ராகுல் டிராவிட் டெஸ்ட் இன்னிங்ஸ் போல ஆரம்பித்தது. கொஞ்சம் கொஞ்சமாக வேகம் எடுத்தது. எப்படி பந்து வீச்சாளர்கள், இவர் எப்ப அவுட் ஆவார் என நினைப்பார்களோ. அது போல விநியோகஸ்தர்களும், சி செண்டர் தியேட்டர் உரிமையாளர்களும் எப்படா இந்தப்படத்தை மெயின் தியேட்டர்கள் கூட்டம் குறையும். எடுப்பார்கள் என பார்த்துக் கொண்டே இருந்தார்கள். ரிப்பீட் ஆடியன்ஸ் என்பார்களே, அது இந்தப்படத்திற்கு வந்து கொண்டே இருந்தார்கள். பாடல்களும், நகைச்சுவை காட்சிகளும் அப்படி அமைந்த படம். பல தியேட்டர்களி சில்வர் ஜூப்ளி. இந்தப் படத்திற்குப் பின், அம்மன் கோவில் கிழக்காலே, நினைவே ஒரு சங்கீதம், நானே ராஜா நானே மந்திரி, தெற்கத்தி கள்ளன்,பொன்மனச் செல்வன், கோவில் காளை,சின்னக் கவுண்டர் என ஏகப்பட்ட கிராம கேரக்டர்களை அவர் செய்து விட்டார். அவர் அளவிற்கு அந்த கேரக்டரை authoritive ஆக திரையில் pull செய்தவர்கள் குறைவு. விஜய்காந்த் என்றாலே போலீஸ் கேரக்டர் என்பார்கள். கோபக்கார இளைஞன் வேடம் என்பார்கள், சிவப்பு மல்லி, அலை ஓசை என புரட்சிகர வேடங்களில் நடித்தவர் என்பார்கள். அதற்கு எந்த விதத்திலும் குறைந்தது இல்லை விஜய்காந்த நடித்த கிராமத்து இளைஞன் வேடங்கள்.

புலன் விசாரனை

புலன் விசாரனை படத்தின் அறிவிப்பு வந்த போது, மிகப்பெரிய ஆர்வத்தூண்டல் எல்லாம் ஏற்படவில்லை. அப்போது விஜயகாந்த் ஆண்டிற்கு குறைந்தது ஆறு படங்கள் கொடுப்பார். எண்பதுகளில், ஆண்டுக்கு பத்துப் படங்கள் என்பது விஜய்காந்திற்கு சர்வ சாதாரணம். தீபாவளிக்கு விஜய்காந்த் படம் வருகிறதா என்றெல்லாம் கேட்க மாட்டார்கள். ஒன்னா ரெண்டா எனக் கேட்பார்கள். வருகின்ற எல்லாப் படங்களுமே மினிமம் கியாரண்டிதான். அதனால் பூஜை போட்டாலே, படம் வியாபாரமாகி விடும். அதிர்ஷ்டம் இருந்தால் வாங்குபவர்களுக்கு ஜாக்பாட் அடித்து விடும். ஊமை விழிகள், உழவன் மகன், செந்தூரப்பூவே போன்ற ஆக்‌ஷன் படங்களை விடுங்கள். வைதேகி காத்திருந்தாள், அம்மன் கோவில் கிழக்காலே, நினைவே ஒரு சங்கீதம், பூந்தோட்ட காவல்காரன் போன்ற படங்கள் எல்லாம், தயாரிப்பாளர் துவங்கி, வினியோகஸ்தர்கள், தியேட்டர் அதிபர்கள், சார்பு தொழில்கள் செய்பவர்கள் வரை அனைவருக்கும் பெரு மகிழ்ச்சியைக் கொடுத்த படங்கள். எனவே 1989 ஆம் ஆண்டு, புலன் விசாரனை அறிவிப்பு வந்த போது பெரிய எதிர்பார்ப்பு எல்லாம் இல்லை. எல் பி ரெக்கார்ட் வந்த போதும் வெறும் மூன்று பாடல்கள் தானாம் என கேசட் ரெக்கார்டிங் கடைகளில் சலித்துக் கொண்டார்கள். ஆனால் அந்த எல் பி ரெக்க்கார்ட் கவரில் இருந்த விஜய்காந்தின் ஸ்டில் ஆர்வத்தை தூண்டியது. ஒரு லாங் கோட், முழங்கால் வரை அணிந்திருந்த கம் பூட்ஸ், கைகளில் கிளவுஸ், மழைத் தொப்பி சகிதம் ஒரு கேட்டை திறந்து கொண்டே பின்னால் திரும்பிப் பார்ப்பது போன்ற ஒரு ஃபோஸ். 1990 ஆம் ஆண்டு, பொங்கலுக்கு படம் வெளியானது. ரஜினிகாந்தின் பணக்காரன், பிரபுவின் இரண்டு படங்களும் உடன் வெளியாகின. பணக்காரன் சத்யா மூவீஸ் தயாரிப்பு. பி வாசு இயக்கம், இளையராஜாவின் இசையில் பாடல்கள் நல்ல ஹிட். எங்கள் ஊர்காரர்கள் எல்லாம், திண்டுக்கலுக்கு சென்று பணக்காரன் பார்த்து விட்டு வந்தார்கள். வழக்கப்படி அப்படியே அடுத்த ஷோ விஜய்காந்திற்கு. அவர்களுக்கு மட்டுமல்ல, திரையரங்கில் இருந்த எல்லோருக்கும் புலன் விசாரனை திரைப்படம் ஒரு புது அனுபவமாக இருந்தது. அதற்கு முன்னர் தமிழ் சினிமாவில் வந்த, அரசியல் படங்களாகட்டும், போலிஸ் படங்களாகட்டும் ஒரு பொதுவான டெம்பிளேட்டில் தான் இருக்கும். அரசியல் வாதிகள் கெட்டவர்கள், நாயகன், குணாசித்திர நடிகர்கல் அந்த கேரக்டரில் நடித்தால் போலிஸ் நல்லவர். வில்லன் நடித்தால் கெட்டவர். அவ்வளவு தான். சம்பங்களும் பொதுவான, கற்பனையான சம்பவங்கள். ஆனால் புலன் விசாரனை படம், என்னடா, தரையில பார்த்ததெல்லாம் திரையில வருது என்னும் அளவிற்கு செய்தித்தாள்களில் படித்த, பதட்டப்பட்ட சம்பவங்களை தன் கதையில் மைய இழையாக வைத்திருந்தது. எண்பதுகளில் தமிழ் மக்களை அதிர்ச்சியடைய வைத்திருந்த ஆட்டோ சங்கர் சம்பவம். அந்தக் கூட்டத்தின் அரசியல் தொடர்பு, அந்த அரசியல் தொடர்பு நீளும் மெடிக்கல் மாஃபியா என பிரம்மாண்டமான கேன்வாஸ். கதை மட்டுமல்லாமல், வசனங்களும் ஷார்ப்பாக இருந்தன. தமிழ்சினிமாவின் அரசியல் வசனங்களில் பெஞ்ச்மார்க் என்றால் பராசக்தி. அதற்கடுத்து பல படங்களை மைல்கல்லாக அமைத்தார் கலைஞர். இளங்கோ, எஸ் ஏ சாமி ஆகியோரின் வசனங்களும் அமைப்புக்கு எதிராக ஷார்ப்பாக இருக்கும். ஆனால், திராவிட முன்னேற்ற கழகம் ஆட்சி அமைந்த உடன், அதுவரை பெரிதாக அரசியல் வசனங்கள் எழுதாத பலர், திராவிட ஆட்சிக்கு எதிராக வசனங்கள் எழுத ஆரம்பித்தார்கள். இதில் என்ன பிரச்சினை என்றால், அவர்கள் அமைப்பிற்கோ, கொள்கைக்கோ எதிராக இல்லாமல், அரசியல்வாதிகளை குறி வைத்தே வசனங்களை எழுதினார்கள். பத்திரிக்கைகளும் சரி, சினிமாக்களும் சரி, அரசியல் வாதிகள் என்றாலே கெட்டவர்கள் என்ற பிம்பத்தை விதைத்தார்கள். விகடன்,கல்கி போன்ற பத்திரிக்கைகள் விசு, கோமல் சுவாமிநாதன் போன்ற எழுத்தாளர்களும் இதை தொடர்ந்து செய்தார்கள். carried by the wind என்பதைப் போல, எஸ் ஏ சந்திரசேகர், மணிவண்ணன் போன்றவர்களும் அரசியல் வாதிகளை கெட்டவர்களாக சித்தரித்தே எழுதினார்கள். லியாகத் அலிகானும் அதில் ஒருவர். ராம நாராயனன் போன்ற வெகு சிலர் தான் கொஞ்சம் சமநிலையில் எழுதினார்கள். ஆனால் விஜய்காந்த் போன்ற பவர்ஃபுல் நடிகரின், படங்களில் அது போன்ற காட்சி வருவது இன்னும் அரசியல்வாதிகளின் இமேஜை டேமேஜ் செய்யும். அதுவும் லியாகத் அலிகான் போன்றவர்களின் வசனங்கள் இன்னும் இம்பாக்ட் கொடுக்கும். புலன் விசாரனை படத்தில், நிகழ்காலத்திற்கு நெருக்கமான காட்சிகள், அதில் அரசியல் தொடர்பு, கூர்மையான வசனங்கள் என படம் இன்னொரு தளத்திற்குச் சென்றது. கதை, வசனம் மட்டுமல்ல, நல்ல பொருட்செலவில் அமைக்கப்பட்ட காட்சிகளும் படம் பார்த்தவர்களை பிரமிப்பில் ஆழ்த்தின. ஆர் கே செல்வமணி, இந்தப் படக் காட்சிகளை ஓவியமாக தீட்டி, அதை ஒரு ஆல்பமாக ஆக்கி, அதை வைத்து கதை சொல்லி, வாய்ப்பு பெற்றேன் என்று சொல்லியிருப்பார். அந்த உழைப்பு பட உருவாக்கத்தில் பலன் கொடுத்தது. ஆங்கில படங்களில் இருந்து இன்ஸ்பிரேஷன் எடுத்திருந்தாலும், துப்பாக்கி தோட்டா ஒன்று ஸ்லோ மோஷனில் செல்லும் காட்சியில் தியேட்டர் அதிர்ந்தது. ட்ரான்ஸ்பர்மேஷன் காட்சிகளைப் பற்றி, இப்போது அதிகம் சிலாகிக்கிறார்கள். இந்தப் படத்தில், மனித உறுப்புகளை எடுத்து விற்கும் டாக்டராக, கண்ணாடி போட்டு, சாதாரணமாக இருக்கும் சரத்குமார், கிளைமாக்ஸ் காட்சியில், சட்டையைக் கழட்டி போட்டு விட்டு, சிக்ஸ் ஃபேக் உடம்புடன் சண்டையிடும் ட்ரான்ஸ்பர்மேஷன் காட்சி பேசு பொருளானது. அடுத்து ஒரு ஆண்டுக்கு புலன்விசாரனை டாக்டர் என்றே அவர் தமிழ்நாட்டில் அறியப்பட்டார். தமிழ்சினிமாவில், அன்றாட நிகழ்வுகளைக் கொண்டு, அரசியல், சமூக விமர்சனப் படங்களை எடுக்கலாம் என்கிற ஒரு ட்ரெண்டை பவர்ஃபுல்லாக கொண்டு வந்த படம் புலன் விசாரனை என்று சொல்லலாம். எனக்கு தற்போது ஆச்சரியமாக இருப்பது எல்லாம், இந்தப் படத்திற்கு இயக்குநராக ஒப்பந்தமாகும் போது செல்வமணிக்கு 24 வயது. படம் துவங்கி, ஏகப்பட்ட கிரியேட்டிவ் டிஃபரன்ஸ். என் படக் காட்சிகள் இப்படித்தான் அமைய வேண்டும் என்கிற அவரது அடம். அதனால் ஆறு மாதங்கள் படப்பிடிப்பு நடக்கவில்லை. எதிர்பக்கத்தில் இப்ராஹிம் ராவுத்தர் தலைமையில் பவர்ஃபுல் புரடக்‌ஷன் டீம், எல்லாத் தொழிலாளர்களும் அவர்களின் அன்பிற்கு கட்டுப்பட்டவர்கள். தயாரிப்பு டீம் சார்பில் படச் செலவை சுருக்கச் சொல்லி அழுத்தம், அத்தனையையும் மீறி செல்வமணி, தான் நினைத்த அவுட்புட்டை கொண்டு வந்தார். அவரது தைரியம், தன் மேல் இருந்த நம்பிக்கை எனக்கு மிகப்பெரிய ஆச்சரியம். இதோடு இந்தப் பக்கமே வராதே என்று தயாரிப்பு தரப்பால் செட்டில் செய்து அனுப்பப்பட்ட அவர், படம் வெளியானதும், மரியாதையாக அழைத்துச் செல்லப்பட்டு விஜய்காந்தின் 100வது படத்தை இயக்குங்கள் எனக் கேட்டுக் கொள்ளப்பட்டது வரலாறு. இன்றளவும் விஜய்காந்திற்கு கேப்டன் என்கிற பெயரை தமிழ்நாட்டில் நிலை நிறுத்தியதற்கு கேப்டன் பிரபாகரன் படமும், இயக்குநர் செல்வமணியும் முக்கிய காரணம்.

புது வசந்தம்

ஒரு திரைப்படத்தின் வெற்றியை எத்தனையோ வழிகளில் அளவிடலாம். அத்தனை வழிகளிலும் வென்று காட்டிய ஒரு திரைப்படம் புது வசந்தம். தொண்ணூறுகள் என்பது இந்தியாவின் முக்கியமான ஒரு ட்ரான்ஸ்பர்மேஷன் டெக்கேட். எண்பதுகளுக்கும் தொண்ணூறுகளுக்கும் இடையே மக்களின் வாழ்வியல், பொருளாதாரம், சிந்தனைகள், ரசிப்புத்தன்மை இவற்றில் பல வேறுபாடுகள் உண்டு. தொண்ணூறுகளை இந்தியாவின் வளர்ச்சியை நோக்கிய பத்தாண்டுகளாகவே பொதுவாக காணலாம். அந்த தொண்ணூறுகளின் ஆரம்பத்தில் பெயரிலேயே ஒரு பாஸிட்டிவ் தன்மையுடன் வந்த படம் புது வசந்தம். 1990, ஏப்ரல் 14 ஆம் தேதி படம் வெளியானது. அதற்கு முன்னரே வித்தியாசமான பத்திரிக்கை விளம்பரங்களின் மூலம் நிறைய பேருக்கு படம் அறிமுகமாகி இருந்தது. குட்நைட் கொசுவிரட்டிகளின் தயாரிப்பாளர் மோகனும், ஆர் பி சவுத்ரியும் இணைந்து தயாரித்த படம். குட் நைட்டில் இருந்து குட் எடுத்து சூப்பர் குட் ஆக்கி, படம் எடுத்தார்கள். இது வழி தவறிய மேகங்களும் ஒரு பறவையும் நடுவானில் சந்தித்திக் கொண்ட கதை என்பது போன்ற கேப்ஷன்களோடு விளம்பரங்கள். எல்லா விளம்பரங்களிலும் ஆடு மேய்த்த மாதிரியும் ஆச்சு, அண்ணனுக்கு பொண்ணு பார்த்த மாதிரியும் ஆச்சு என்பது போல குட்நைட் விளம்பரங்களும் இருக்கும். படத்தின் முதல் வெற்றி, இது முதன் முதலாய் வரும் பாட்டு பாடல் ஒளியும் ஒலியுமில் ஒளிபரப்பான போது தெரிந்தது. வத்தலகுண்டு ஊராட்சி ஒன்றிய டிவியில் கூட்டமாக நின்று பார்த்துக் கொண்டிருந்தேன். கிட்டத்தட்ட நூறு பேர். எல்லா வயதிலும் ஆண், பெண்கள். பாட்டு துவங்கிய போது அசுவராசியமாக பார்க்கத் துவங்கியவர்கள், பாடல் முடியும் போது, பாடலில் ஐக்கியமாகி இருந்தார்கள். மதுரையில் அழகர் ஆற்றில் இறங்கும் திருவிழா. வந்த எல்லோருக்கும் புது வசந்தம் பார்த்தே ஆக வேண்டும் என்கிற ஆவல். அந்த அளவிற்கு வாய்மொழியாக பரவி இருந்தது படத்தின் சிறப்பு. தல்லாகுளத்துல கள்ளழகர் எதிர் சேவைக்கு நிக்கிற கூட்டத்த விட சக்தி தியேட்டர்ல ஜனம் நிக்கிதப்போ என பேசிக் கொண்டார்கள். படத்தின் இசை அமைப்பாளர், எஸ் ஏ ராஜ்குமார்க்கு, அவரின் முதல் படமான சின்ன பூவே மெல்ல பேசு படத்தின் வெற்றிக்குப் பிறகு, 36 படங்கள் புக் ஆகின. ஆனால் அதன்பின் எந்த வெற்றியும் இல்லாமல், சோர்ந்து போனார். அவருக்கு இந்தப் படத்தின் வெற்றிக்குப் பின்னர் மீண்டும் அதே போல நடந்தது. இம்முறை சுதாரித்துக் கொண்டார். பட நாயகன் முரளியும் தன் கேரியரின் மோசமான காலத்தில் இருந்தார். இந்தப் படத்திற்கு முன் வந்த பாலம் திரைப்படம் அவரை மூச்சு விட வைத்தது. இந்தப் படத்தின் வெற்றி அவரை மூச்சு கூட விட முடியாமல் இடைவிடாமல் நடிக்கும் படி செய்தது. ஏராளமான புது இயக்குநர்கள், தங்கள் முதல் படத்தில் முரளி நடித்தால் பெட்டர் என அவரை தேடி ஓடினார்கள். தமிழ் திரையுலகில், அதிகமான இயக்குநர்களின் முதல் படத்தில் நடித்தவர் என்ற பெருமையையும் முரளிக்கு பெற்றுக் கொடுத்தது. ஏராளமான புது இயக்குநர்களுக்கு முதல் படம் இசை அமைத்துக் கொடுத்தவர் இளையராஜா என்பார்கள். அதுபோல நடிகர்களில் முரளி. கிட்டத்தட்ட தமிழ்நாட்டு மக்கள் மறந்திருந்த ஆனந்தபாபுவிற்கும் இந்தப் படம் ஒரு புது வசந்தம். மிகப்பெரிய கிரானைட் தொழிலதிபரான ராஜாவிற்கும் மீண்டும் ஒரு அறிமுகத்தைக் கொடுத்தது இந்தப்படம். புதுக்கணக்கு எழுதும் போது, முதல் வரவாக,தங்கள் குலதெய்வத்தின் பெயரில் ஒண்ணே கால் ரூபாயை வணிகர்கள் எழுதுவது போல, நண்பர்கள் பற்றிய கதை என்றாலே சார்லிக்கு ஒரு கேரக்டர் என்று எழுதிவிட்டுத்தான் கதை டிஸ்கஷனுக்கே இயக்குநர்கள் உட்கார்ந்தார்கள். நாயகி சித்தாராவிற்கு தேவதை ஸ்டேட்டஸை உடனடியாக வழங்கினார்கள் தமிழ்நாட்டு மக்கள். அவர் தங்களை கொல்ல வந்தால் கூட, தங்களின் நன்மைக்காகத்தான் இருக்கும் என நம்பும் அளவிற்கு, அப்படி ஒரு மதிப்பு அவரின் மேல் எல்லோருக்கும் ஏற்பட்டது. படத்தயாரிப்பாளர் ஆர் பி சௌத்ரி, 50 படங்களுக்கும் மேல் தயாரித்து, அவரது இரு மகன்கள் ஹீரோக்களாகும் அளவிற்கு வலுவான அடித்தளத்தை கொடுத்தது இந்தப்படம். அப்போது, ஒரு படம் ஹிட்டானால், அந்தப் பட இயக்குநரையும், நாயகியையும் வைத்து கிசுகிசுக்கள் கிளம்பும். ஆனால் இந்தப் படத்தின் வெற்றிக்குப் பின்னார், இயக்குநர் விக்ரமனையும் அப்போது, இந்தியில் நம்பர் 1 ஆக இருந்த ஸ்ரீதேவியையும் இணைத்து கிசுகிசு கிளம்பியது. இந்தப் படத்தை விக்ரமன் இந்தியில் இயக்கப் போவதாகவும், அதில் சித்தாரா கேரக்டரில் ஸ்ரீதேவி நடிக்கப் போவதாகவும், கதையைக் கேட்டு, ஸ்ரீதேவி விக்ரமனை திருமணம் செய்து கொள்ள முடிவெடுத்ததாகவும் பத்திரிக்கைகளில் செய்தி. என்னைப் பொறுத்த வரையில் அதுதான் விக்ரமனுக்கு அவர் வாழ்வில் கிடைத்த அதிக பட்ச அவார்ட். படத்தில், தீபாவளி தினத்தன்று, சித்தாரா, நண்பர்களுக்கு ஒரு உடை பரிசளிப்பார். மஞ்சள் நிற சட்டை, கறுப்பு பேண்ட். அந்தத் தீபாவளிக்கு எல்லா டெய்லர் கடைகளிலும் மஞ்சள் சட்டைகள் சரம் சரமாகத் தொங்கின. அப்போது, மயூர் ஷர்ட்ஸ்என்கிற ஒரு பிராண்ட் இருந்தது. அதில் நீலம், பச்சை, சிகப்பு, மஞ்சள் போன்ற அடர் வண்ணங்களில் சட்டை துணிகள் கிடைக்கும். அந்த தீபாவளிக்கு தமிழ்நாட்டில் மஞ்சள் நிற சட்டைத்துணிகள் அவுட் ஆஃப் ஸ்டாக் ஆகி, புதிதாக வரவழைக்கும் படி ஆனது. தெருவில் வெடி வெடிக்கும் போது, நீயுமா நீயுமா என்ற குரல்கள். தீபாவளி முடிந்து, வகுப்புகளுக்கு, தீபாவளி ட்ரஸ் அணிந்து செல்லும் கலர்புல் வைபவம், சீருடை அணிந்து செல்வது போல மாறி, உப்புச் சப்பில்லாமல் போனது. இது முதன் முதலாய் வரும் பாட்டு பாடலில் ஒரு வரி வரும். ஏக போக அரசர்கள் எல்லாம் இருக்கும் உலகிலே இந்த ஏகலைவன் பாட்டும் கூட ஜெயிக்கும் நடுவிலே என்று.. உண்மையில் அந்தக் சமயத்தில் நடிகர்களிலும், இயக்குநர்களிலும், இசை அமைப்பாளர்களிலும் அத்தனை திறமைசாலிகள் இருந்தார்கள். அவர்களுக்கு இடையே நின்று விளையாடியது இந்தப் படம். போட்டிகளால் சோர்வுறும் நேரங்களில் எல்லாம் குடிக்கக்கூடிய ஹார்லிகஸ் ஆக இருந்து கொண்டிருக்கிறது இந்த வரிகள்.